പരിചയം

പത്താം വയസ്സിൽ വിദ്യാർത്ഥി രാഷ്ട്രീയത്തിലൂടെ പൊതുപ്രവർത്തന രംഗത്തെത്തിയ എ.കെ.എം. അഷറഫ്, തുടക്കം മുതൽ തന്നെ സാമൂഹിക ഇടപെടലുകളിലും സംഘടനാ പ്രവർത്തനങ്ങളിലും സജീവ സാന്നിധ്യമാണ്. എം.എസ്.എഫ് പഞ്ചായത്തു മുതൽ മണ്ഡലം, ജില്ലാ കമ്മിറ്റികളിൽ വിവിധ പദവികളിൽ പ്രവർത്തിച്ചു; പഞ്ചായത്ത്, മണ്ഡലം പ്രസിഡണ്ട്, സെക്രട്ടറി, ജില്ലാ ജനറൽ സെക്രട്ടറി, സംസ്ഥാന പ്രവർത്തക സമിതി അംഗം എന്നീ സ്ഥാനങ്ങളിലൂടെ സംഘടനാ പ്രവർത്തനങ്ങൾക്ക് ശക്തി നൽകി.

അദ്ദേഹത്തിന്റെ വിദ്യാഭ്യാസം എ.കെ.എം.ജി.യു.പി.എസ് കടമ്പാർ, ജി.എച്ച്.എസ്.എസ് ബങ്കര (മഞ്ചേശ്വരം), ഗോവിന്ദ പൈ കോളജ് മഞ്ചേശ്വരം എന്നിവിടങ്ങളിലാണ് പൂർത്തിയായത്. ജി.എച്ച്.എസ് ബങ്കരയിൽ സ്കൂൾ ലീഡർ സ്ഥാനവും വഹിച്ചിട്ടുണ്ട്. ബിരുദപഠനകാലത്ത് മൂന്നു വർഷവും ഗോവിന്ദപൈ ഗവ. കോളേജ് യൂണിയൻ ഭാരവാഹിയായി — സ്റ്റുഡന്റ് എഡിറ്റർ, ജനറൽ സെക്രട്ടറി, എം.എസ്.എഫുകാരനായ ആദ്യത്തെ കോളജ് യൂണിയൻ ചെയർമാൻ.

മുസ്ലിം യൂത്ത് ലീഗിന്റെ സംസ്ഥാന സെക്രട്ടറി, കാസർഗോട് ജില്ലാ ജനറൽ സെക്രട്ടറി എന്നീ പദവികളിൽ പ്രവർത്തിച്ച അദ്ദേഹം, 2001–2006 കാലഘട്ടത്തിൽ കേരള ബാംബൂ കോർപ്പറേഷൻ ഡയറക്ടറായും സേവനമനുഷ്ഠിച്ചു.

കന്നഡ സാഹിത്യത്തിൽ ബിരുദം നേടിയ അഷറഫ്, മലയാളം, കന്നഡ, തുളു, ഉർദു, ഇംഗ്ലീഷ് ഭാഷകൾ ഒരേപോലെ സംസാരിക്കുന്ന മൾട്ടിലിംഗ്വൽ വക്താവ് കൂടിയാണ്. വിപുലമായ പ്രസംഗശേഷിയാൽ വിവിധ വേദികളിൽ സജീവമാണ്.

കായികരംഗത്തും നിശ്ചിത ഇടപെടലുകൾ നടത്തിയ അദ്ദേഹം കാസർഗോഡ് ജില്ലാ കബഡി അസോസിയേഷൻ, അണ്ടർ ആം ക്രിക്കറ്റ് അസോസിയേഷൻ എന്നീ സംഘടനകളുടെ ചെയർമാനായും പ്രവർത്തിച്ചു.